ក្រសួងការពារជាតិ៖ សេចក្តីថ្លែងការណ៍របស់ ខុមហ្វ្រែល គឺជាការលាបពណ៌ និងប្រមាថដល់កងយោធពលខេមរភូមិន្ទ ។
អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ បានចាត់ទុកថា សេចក្តីថ្លែងការណ៍របស់អង្គការខុមហ្វ្រែល ដែលបង្គាប់មកលើកងយោធពលខេមរភូមិន្ទ គឺជាការលាបពណ៌ និងប្រមាថមាក់ងាយដល់កិត្តិយស តួនាទី និងភារកិច្ចរបស់កងទ័ពកម្ពុជា ដែលក្រសួងការពារជាតិ មិនអាចទទួលយកបានឡើយ។
លោកនាយឧត្តមសេនីយ៍ បានបញ្ជាក់ប្រាប់បណ្តាញព័ត៌មាន នៅយប់ថ្ងៃទី២៥ ខែឧសភានេះ យ៉ាងដូច្នេះថា៖ «សេចក្តីថ្លែងការណ៍របស់ សមាគម និងអង្គការសង្គមស៊ីវិលនៅកម្ពុជានៃបន្ទប់ស្ថានការណ៍ សម្រាប់ការបោះឆ្នោតគឺមានចេតនាញុះញង់ និងលាបពណ៌មកលើកងយោធពលខេមរភូមិន្ទ និងជាការប្រមាថមាក់ងាយដល់កិត្តិយស តួនាទី ភារកិច្ចរបស់កងយោធពលខេមរភូមិន្ទ។ សេចក្តីថ្លែងការណ៍ ដោយបង្គាប់បញ្ជា មកលើកងយោធពលខេមរភូមិន្ទ គឺជាការរំលោភដ៏ធ្ងន់ធ្ងរ មកលើកងយោពលខេមរភូមិន្ទ ដែលមិនអាចទទួលយកបានឡើយ»។
ប្រតិកម្មរបស់អ្នកនាំពាក្យក្រសួងការពារជាតិ បានធ្វើឡើងបន្ទាប់ពីអង្គការខុមហ្វ្រែល រួមជាមួយនឹង សមាគម និងអង្គការសង្គមស៊ីវិលនៅកម្ពុជា នៃបន្ទប់ស្ថានការណ៍សម្រាប់ការបោះឆ្នោត បានចេញសេចក្តីថ្លែងការណ៍ កាលពីថ្ងៃពុធ អំពាវនាវឱ្យ គ.ជ.ប ព្រមានទៅលើមន្រ្តីកងយោធពលខេមរមភូមិន្ទ ដែលបានប្រកាសចាត់វិធានការលើបង្រ្កាបចំពោះ ការបង្កអសន្តិសុខសង្គម នៅអំឡុងពេលបោះឆ្នោត។ ក្រុមអង្គការសង្គមស៊ីវិលទាំងនោះ បានសម្តែងការ ព្រួយបារម្ភ អំពីផលប៉ះពាល់ដល់ ដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ ចំពោះសារព្រមានរបស់ មន្រ្តីជាន់ខ្ពស់នៃកងយោធពលខេមរភូមិន្ទ នាពេលនេះ។
នាយឧត្តមសេនីយ៍ ឈុំ សុជាតិ បានបញ្ជាក់យ៉ាងច្បាស់ថា សកម្មភាព និងអនុសាសន៍របស់មន្រ្តីជាន់ខ្ពស់នៃកងយោធពលខេមរភូមិន្ទកន្លងមក មិនប៉ះពាល់ដល់ការបោះឆ្នោតទេ វាជាការជំរុញដល់ការការពារសន្តិសុខសម្រាប់ការបោះឆ្នោតនៅកម្ពុជា ដោយមិនឱ្យជនណាកេងយកឱកាសនេះបង្កអសន្តិសុខ បំផ្លាញសេចក្តីសុខរបស់ប្រជាជនខ្មែរឡើយ។
No comments:
Post a Comment